जनकपुरधाम । मधेस प्रदेशमा मुख्यमन्त्री जितेन्द्र प्रसाद सोनलको नेतृत्वमा बनेको सरकार ढलेपछि सत्ता पक्ष र विपक्षबिच आरोप–प्रत्यारोप सुरु भएको छ। सत्ता पक्षले विपक्षी दल र सभामुखमाथि दोषारोप गरे पनि विपक्षी नेताहरूले ती आरोपहरू अस्वीकार गर्दै सरकार आफ्नै कमजोरी र आन्तरिक विवादका कारण ढलेको बताएका छन्।
नेपाली कांग्रेसका संसदीय दलका नेता कृष्णप्रसाद यादवले पनि सोनल सरकार भित्रकै अविश्वास र अन्तर्द्वन्द्वलाई कारण देखाउँदै भने, “हामीले लोकतान्त्रिक अभ्यासअनुसार आफ्नो भूमिका निभाएका हौँ। सत्ता गठबन्धनभित्र सहकार्य नहुँदा यस्तो अवस्था आएको हो।”
विपक्षी नेताहरूले मधेस प्रदेशको यो घटना सामान्य राजनीतिक प्रक्रिया भएको भन्दै यसलाई अस्वाभाविक रूपमा चित्रण नगर्न आग्रह गरेका छन्।
