धनुषा । मधेस प्रदेशमा सरकार गठनको प्रक्रियाविरुद्ध सात राजनीतिक दलका प्रदेश सांसदहरूले विरोध प्रदर्शन सुरु गरेका छन्।
उनीहरूले प्रदेशका मुख्यमन्त्री सरोजकुमार यादवको नियुक्ति प्रक्रियालाई असंवैधानिक ठहर गर्दै विरोध गरेका हुन्। धर्नामा सहभागी सांसदहरूले प्रदेश सरकार गठनको प्रक्रिया संविधानको धारा १६८ को उपधारा (३) विपरीत भएको दाबी गर्दै एमालेको नेतृत्वमा बनेको यो सरकारलाई ‘अवैध’ भनेका छन्। धर्नास्थलमा सांसदहरूले सरकारविरुद्ध चर्को नाराबाजी गरेका छन्।
यसैबिच, विरोधी दलहरूले यो मुद्दालाई कानुनी बाटोबाट पनि अगाडि बढाएका छन्। नेकपा एमालेबाहेकका दलहरूका ७४ जना प्रदेश सांसदहरूको हस्ताक्षरसहित मुख्यमन्त्री यादवको नियुक्ति खारेजीको माग गर्दै सर्वोच्च अदालतमा रिट निवेदन दर्ता गरिएको छ।
