बारा । जीतपुरसिमरा उपमहानगरले पहिलो पटक पञ्चवर्षीय योजना तर्जुमाका लागि स्थानीय स्तरमा सुझाव सङ्कलन सुरु गरेको छ । अगामी ५ वर्षका लागि आवधिक योजना तर्जुमा गर्न उपमहानगरले राजनीति दलका नगर कमिटी प्रतिनिधि, सहकारी तथा सङ्घसंस्थाका प्रतिनिधि, बौद्धिक वर्ग र वडास्तरमा जनताहरूको घरदैलोमा पुगेर सुझाव सङ्कलन सुरु गरेको हो ।
यसले उपमहानगरको विकासमा निर्दिष्ट दिशा प्रदान गर्ने प्रमुख प्रशासकीय अधिकृत शान्तिराज प्रसाईँले बताएका छन् । ‘आवधिक योजना तयार गर्न सकियो भने नगरसभामा हुने अधिकांश विवाद आफै अन्त्य हुन्छ’ सहसचिव प्रसाईँले भने ‘हामीकहाँ त वडाहरूसँग अल्पकालीन र दीर्घकालीन कुनै योजनाहरू छैनन्, सबैले आ–आफ्नै खल्तीको योजना पास गर्नुपर्ने दबाबका कारण नै सधैँ नगरसभा विवाद सिर्जना हुने हो ।’प्रसाईँले आवधिक योजना तयार गर्न वडाहरुमा सुझाव सङ्कलन सुरु भइसकेको बताए ।
आवधिक योजना निर्माणमा राजनीतिक दलहरूको घोषणापत्रलाई पनि महत्त्वपूर्ण आधार मानिने भएकाले २०७४ र २०७९ को स्थानीय तह निर्वाचनमा प्रकाशन भएका नगर तथा वडा स्तरका घोषणापत्र उपलब्ध गराउन उपमहानगरले आग्रह गरेको छ ।
नगर प्रमुख राजन पौडेलले आवधिक योजनाले समग्र नगर विकासको खाका तय हुने भएकाले सबैको सक्रिय सहभागिताका लागि आग्रह गरेका छन् । उनले उपमहानगर अन्य कामकाजमा अल्झेका कारण आवधिक योजना तयार पार्न ढिला भएको टिप्पणी गरे ।
आवधिक योजना ३ वर्ष वा ५ वर्षका लागि तयार पारिन्छ । बारामा कलैया उपमहानगर ५ वर्षीय आवधिक योजना तयार गरेर कार्यान्वयनको दोस्रो वर्षमा रहेको प्रमुख प्रशासनिक अधिकृत नाथु साहले जनाएका छन् ।
उनले भौगोलिक विविधता, समग्र विशेषता, सहभागिता मूलक तथा समावेशी पक्षहरूलाई समेटेको हुँदा वार्षिक कार्यक्रमहरू पनि यसै अनुसार तर्जुमा गर्न हुने बताए ।
स्थानीय स्वायत्त शासन ऐन, २०५५ ले प्रत्येक पालिकाले आवधिक योजना तर्जुमा गर्नुपर्ने र त्यसैका आधारमा वार्षिक कार्यक्रमहरू सञ्चालन गर्नुपर्ने कानुनी एवं वाध्यात्मक व्यवस्था गरेको छ ।
तर, अधिकांश पालिकाहरूले विभिन्न बहाना बनाएर आवधिक योजनाहरू बिना नै राजनीतिक दल र तिनका जनप्रतिनिधि अनुकूल वार्षिक कार्यक्रमहरू बनाउने, बजेट तयार पार्ने र सोही अनुसार खर्च गर्दै आएका छन् ।
